ЭКСПО-ҒА КЕЛГЕН КОНГО АЗАМАТШАСЫ ЕЛІНЕ ҚАЙТА АЛМАЙ ЖҮР
Астанаға қыдырып келген конголық Моника Камганза туған жеріне орала алмай жүр, деп хабарлайды ҚазАқпарат «Хабар 24» телеарнасына сілтеме жасап.Мәлім болғандай, Моника Қазақстанға былтыр ЭКСПО көрмесіне келген. Осында ер азаматпен танысып, біраз уақыттан кейін онымен қарым-қатынасын үзген. Қазір қолында кішкентай сәбиі бар. Ал виза мерзімін ұзарту керектігін білмеген. Осылайша, қазір ол үй-күйсіз қалып отыр. Оның үстіне, конголық азаматшаның тек француз тілінде сөйлеуі онымен тілдесуді қиынға соқтыруда.
Кәмелеттік жасқа толмағандар жөніндегі инспекция Мониканы әлеуметтік-құқықтық қорғау орталығына жіберген. Олар сәбидің өмірге келуіне көмектескен.
«Егер миграциялық полиция оны визалық режимді бұзғаны үшін елден кетуге мәжбүрлесе, оның жолақысын ешкім де өтей алмайды. Бұл үлкен қаражат, ал азаматшаның бір тиыны да жоқ. Ол Қазақстанда қалуға көмек сұрап отыр. Мұның жолы бар. Бірі - ықтиярхат алу. Алайда оның есепшотында 3 млн теңгесі болуы тиіс. Не босқын мәртебесін алу. Бұл да күрделі мәселе», - дейді қор директоры Анна Рыль.
