Сыр Медиа

«Туған жерге туыңды тік» - деген дана халқымыз. Бұл – әрбір адамның кіндік қаны тамған жеріне сүйіспеншілікті білдіреді. Яғни, кез-келген азамат өзінің тарихына, мәдениетіне, салт-дәстүріне терең бойлау білуі керек. Мемлекет басшысы өзінің «Болашаққа бағдар: рухани жаңғыру» атты мақаласында «Туған жер» бағдарламасын ұсынып, жас ұрпақтың бойына сүйіспеншілік, патриоттық сезімді қалыптастыру керектігін атап өтті.

Туған жерге сүйіспеншілік туған тарихыңды тереңнен білуден басталады. Еліміздің әрбір тауы мен өзені, сайы мен қыры – тұнып тұрған тарих. Оған сай сол өлкеде халқына пана бола білген, ел есінде қалған біртуар перзенттер бар. Ал, олар жайында жас ұрпақтың білгені абзал. Сондықтан, білім беру саласында өлкетану жұмыстарын жүргізіп, тарихи-мәдени ескерткіштерді қалпына келтіру қажет.

Осыған орай Қызылорда қаласының тарихи-өлкетану музейінің конференция залында "Тарихи сыры көп - Сыр өңірі" атты жас өлкетанушылардың ғылыми-танымдық конференциясы ұйымдастырылды.

Аталған шараға қаладағы химия-биология бағытындағы Назарбаев зияткерлік мектебінің оқушылары, №3,101,42 мектеп-лицейінің оқушылары және №4,132 орта мектеп оқушылары қатысып, Сыр өлкесінің тарихына қатысты ғылыми баяндамалар оқыды.

Шара соңында баяндамашыларға облыстық тарихи-өлкетану музейі атынан сертификат табысталды.