Аймақта бірқатар мәдени нысандар пайдалануға берілді
Бұл туралы бүгін Өңірлік коммуникациялар қызметінің ақпараттық алаңында өткен баспасөз конференциясында облыстық мәдениет, мұрағаттар және құжаттама басқармасы басшысының орынбасары Әділбек Ерсұлтанов мәлім етті.
Өткен жылы мәдениет нысандарын жаңғырту мақсатында Шиелі ауданындағы Еңбекші, Жалағаш ауданындағы Мәдениет ауылдық клубтары салынды. Сондай-ақ, сыйымдылығы 600 мың құжатты қамтитын жаңа типтегі облыстық мемлекеттік архивінің ғимараты пайдалануға берілді.
«Бүгінгі күні заманауи құрылғылармен жабдықталған архивте деректердің барлығы сандық жүйеге көшірілуде. Сонымен қатар, Астананың 20 жылдық мерейтойымен рухани үндес Қызылорда қаласының 200 жылдығында Алаш арыстарының басын қосқан алғашқы астана болып, Қазақ атауын қайтарған тарихи ғимарат Қазақ атқару комитетінің сызбасы үлгісінде «Қызылорда қаласының тарихы» музейі ашылды», - деді Ә.Ерсұлтанов.
