Қазақстанда 29 мың адам түрмеде жазасын өтеп жатыр
Kyzylorda-news.kz. Қазақстанда ішкі істер органдарына жүргізілген реформалардың арқасында 25 жылда түрмеде жазасын өтеп жатқандардың саны 96 мыңнан 29 мың адамға азайған, деп хабарлайды ҚазАқпарат.
«Соңғы 25 жылдың ішінде сотталғандардың саны жағынан үшінші орында тұрған Қазақстан 72-ші орынға көтерілді. Бұл дегеніңіз - түрмедегі азаматтардың санын үш жарым есеге азайттық деген сөз. Бұл нәтижелі жұмыс Елбасының саясаты мен ел басшылығының салиқалы саясатының арқасында іске асырылғанын атап өту керек. Бұрын сотқа тартылғандардың 80-90 пайызына дейін бас бостандығынан айырылатын. Ал қазір тек 40 пайызы ғана түрмеге қамалуда. Біз халықаралық стандартқа жетуіміз керек. Ол стандарт бойынша сотқа тартылғандардың 10 пайызы ғана түрмеде жазасын өтеуі керек. Бұл көрсеткішке ақырындап жақындап келеміз», - деді ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Алик Шпекбаев ІІМ-де өткен отырыста.
Алик Шпекбаев ширек ғасыр бұрын түрмеде жазасын өтеп жатқан адамның саны 96 мың болғанын атап өтті. Қазіргі уақытта 29 мың адам түрмеде отыр.
«Бұл көрсеткіш азайып келеді. Міне, реформа деген сөз. Осы бірлескен жұмыстың нәтижесін көріп отырмыз», - деп түйіндеді ол.
Айта кетсек, бүгін елордада ІІМ мен Мемлекеттік қызмет істері және сыбайлас жемқорлыққа қарсы іс-қимыл агенттігі басшылығы азаматтық қоғам және БАҚ өкілдерімен кездесу өткізді. Кездесуде ішкі істер министрлігінің Жол картасы негізінде қоғамдастық және ведомстволар әзірлеген ішкі істер органдарындағы жемқорлықпен күрестің үшжақты жоспары таныстырылды.
«Реформа бағдарламасын әзірлеуде белсенді түрде атсалысып жүрген азаматтарға ерекше алғысымды айтқым келеді. ІІМ Сіздермен әрдайым бірлесе еңбек етуге дайын. ІІМ тек сынның астында қалатын орган емес, сенімге ие болғанын қалаймыз», - деді ішкі істер министрі Ерлан Тұрғымбаев.
