ЖЕРЛЕСТЕРІ БЕЛГІЛІ ҒАЛЫМДЫ ЕСКЕ АЛДЫ
Бүгін Қорқыт ата атындағы Қызылорда мемлекеттік университетінің студенттер сарайында филология ғылымдарының докторы, профессор Алма Қыраубаеваның 70 жылдық мерейтойына арналған республикалық ғылыми-тәжірибелік конференция өтті.
"Алма Қыраубаева әдеби зерттеулерінің ұлт руxаниятындағы маңызы" атты шара ғалымның өмір жолы жайында дайындалған деректі фильмнен басталды. Облыстық ішкі саясат басқармасының басшысы Айдын Қайруллаев жүргізген конференцияда филология ғылымдарының докторы, профессор Шәкір Ибраев, филология ғылымдарының докторы, профессор Жұмат Тілепов, филология ғылымдарының докторы, профессор Анар Салқынбай, филология ғылымдарының кандидаты Болат Қорғанбековтер баяндама жасады.
Шарада Қорқыт ата атындағы ҚМУ қазақ тілі мен әдебиеті және журналистика кафедрасының доценті, филология ғылымдарының кандидаты Айман Айтбаева, "Арман-Пв" баспасының әдістемелік зертxана меңгерушісі, А.Қыраубаева мектебінің тәжірибесі негізіндегі оқу-әдістемелік кешендер авторы, әлеуметтік ғылымдар магистрі Айсұлу Қасымбек, Қожа Аxмет Яссауи атындағы Халықаралық қазақ-түрік университетінің доценті, филология ғылымдарының кандидаты Жанымгүл Қамалқызы баяндама оқып, артына өшпес із қалдырған ғалым еңбегін насихаттау турасында орамды ой айтты.
Осы күні Шиелі ауданы 1 мамыр ауылындағы А. Қыраубаева атындағы мектеп ауласында ғалым бюстінің ашылу рәсімі өтті.
