Қызылорда ауыз сумен қамту бойынша республикада екінші орында
Kyzylorda-news.kz. ҚР Премьер-Министрі Асқар Мамин бүгін Үкімет отырысында халықты сапалы ауызсумен қамтамасыз етуге бағытталған бірқатар мәселеге назар аудартты, деп хабарлайды ҚазАқпарат.
«Қазіргі таңда Елбасының халықтың тұрмыс сапасын жақсарту тапсырмасын орындау аясында елді мекендерді сумен жабдықтау және оларға су жеткізу бойынша нақты шараларды іске асыру, осы бағыттағы жұмыстарды күшейту керек. Бүгін біз министрлер мен әкімдердің баяндамаларын тыңдадық. Баяндамаларда аталып өткен шараларды жүзеге асырудың нәтижесінде 2023 жылдың аяғына қарай халықты ауызсумен қамтамасыз ету мәселесін 100 пайыз шешуге мүмкіндік жасалады», - деді Үкімет басшысы.
Осы ретте Премьер-Министр ауылдарды ауызсумен қамту деңгейі жоғары өңірлердің жұмысын атап өтті. Атап айтқанда, Алматы облысы тұрғындарының - 89,5 пайызы, Қызылорда облысы тұрғындарының 83,2 пайызы ауыз сумен қамтамасыз етілген. Ал Жамбыл, Қостанай және Павлодар облыстарының әкімдіктерінің жұмысы тиісті деңгейде жүргізіліп отырған жоқ.
«Бұл өңірлердің әкімдері халықты сумен жабдықтау мәселесіне баса назар аударып, осы бағытта белсенді жұмыс жүргізуі керек. Жалпы келесі мәселелерге назар аударғым келеді. Бірінші, ауылдық топтық су таратқыштарға қызмет көрсетуді жақсарту мақсатында осы функцияларды Ауыл шаруашылығы министрлігіне беру жөніндегі ұсынысты, жалпы, қолдаймын. Бір айдың ішінде ауылдық топтық су таратқыштарды беру мәселелерін пысықтап, заңнамалық және заңнамалық-құқықтық актілерге тиісті өзгертулер әзірлеу қажет»,- деді Үкімет басшысы.
Асқар Мамин екіншіден, 2023 жылдың соңына дейін барлық қалалар мен ауылдарды ауызсумен 100 пайыз қамтамасыз ету мақсатында әкімдерге мүдделі мемлекеттік органдармен бірлесіп, өңірлік жоспарларға түзетулерді шұғыл түрде енгізу, барлық нысандардың құрылысын және пайдалануға берудің белгіленген мерзімдеріне сәйкес қамтамасыз ету қажеттігін айтты.
«Үшінші, қалаларда кәріздік тазалау құрылыстарын салу және жаңғырту біз үшін тағы бір маңызды міндет болып саналады. Бұл міндетті шешу тәсілдері айқындалған. Олардың бірі тазарту құрылыстарын салу жобаларының инвестициялық тартымдылығын арттыру болып табылады. Қаржыландыруға да қатысты тиісті жұмыс жүргізіліп жатыр. Оның ішінде Еуропалық қайта құру және даму банкімен жұмыс жүргізілуде және басқа да бірқатар халықаралық қаржы институты осындай жобаларды қаржыландыруға қызығушылық білдіруде. Индустрия, Ұлттық экономика министрліктеріне, әкімдіктерге халықаралық қаржы институттарымен бірлесіп, мемлекеттік-жекешелік серіктестік аясында халықаралық тәжірибені ескеріп, қаржыландыру тетіктерін пысықтауды тапсырамын», - деді Үкімет басшысы.
Сонымен қатар ол Ауыл шаруашылығы және Индустрия министрліктеріне өңірлермен және басқа мүдделі мемлекеттік органдармен бірлесіп, бір айдың ішінде елді мекендерді 100 пайыз деңгейде сумен жабдықтау және оларға су жеткізу бойынша жол картасын әзірлеуді тапсырды.
«Елбасы Нұрсұлтан Назарбаевтың берген тапсырмасын орындау мақсатында халықты сапалы ауызсумен қамтамасыз етіп, өмір сүру сапасын арттыру бойынша нақты шараларды қабылдау керек. Осы ретте Президент Қасым-Жомарт Тоқаевтың өңірлерге жасаған жұмыс сапарларының барысында ауылдар мен қалаларды сумен қамтамасыз ету бойынша берген тапсырмаларын орындау үшін нақты үйлестіру мен жылдамдықты талап ететін ауқымды жұмыс жүргізу керек», - деді Асқар Мамин.
