МЕКТЕП ОҚУШЫЛАРЫ КУБОК ИЕЛЕНДІ
Қазалыда аудандық ішкі саясат бөлімінің қолдауымен, "Жас Орда" жастар қоғамдық бірлестігінің ұйымдастыруымен жыл бойы жайдарманшы жастар арасында тартысты өткен сайыстың ақтық кезеңі болып өтті.
Ақтық сынға жолдама алған сегіз топ додаға түсіп, қызықты ойын өрнегін көрсетті. Оқушылар мен студент жастардан құралған жайдарманшылар сайысында №249 мектеп-лицейдің "50/50" командасы аудан әкімінің арнайы кубогін қанжығасына байлап, бас жүлдені иеленсе. №165 мектеп жастарының "ССМ" командасы 1-орынды, Қазалы көлік-техникалық колледжі студенттерінен құралған "ҚТЖ " командасы 2-орынды, Қазалы агро-колледжі жастарынан құралған "Аграрка" жастары командасы 3-орынды иеленді.
Сайыста аудан әкімінің кеңесшісі Берік Бейсенбаев жетістікке жеткен жастарға сәттілік тілеп, аудан басшысының лебізін жеткізді.
