Қызылордалық қос боксшы туған жеріне келді (ФОТО)
Kyzylorda-news.kz. Бүгін қызылордалықтар бокстан Əлем чемпионатының күміс жүлдегері Қамшыбек Қоңқабаев пен қола жүлдегер Тұрсынбай Құлахметті салтанатты түрде күтіп алды.
Қорқыт ата əуежайына қос боксшының туыстары, жанкүйерлер, спортшылар, жаттықтырушылар жəне спорт саласының қызметкерлері жиналды.
"Шаршы алаңға шыққанда халқымның қолдауын сезіндім. Маған жанкүйер болған барша қазақстандықтарға, Сыр халқына алғыс білдіремін", - деді Қамшыбек.
Жақында ғана Ресейдің Екатеринбург қаласында бокстан Əлем чемпионаты өткен болатын.
Дүбірлі доданың қорытындысы бойынша Қазақстан жалпы командалық есепте 1 алтын, 1 күміс, 4 қола медальмен 3-орынды иеленді.
Бұл сында Сыр спортшылары Қамшыбек Қоңқабаев (+91 келі) күміс, Тұрсынбай Құлахмет (75 келі) қола жүлделерді еншіледі.
