Сыр Медиа

Облыс көлемінде 24-наурыздан бастап «Жасөспірім және көше» жедел-профилактикалық шарасы өткізілуде.

  Іс-шараның негізгі мақсаты – кәмелетке толмағандар арасындағы қылмыстардың, оның ішінде топтық төбелес, бопсалау деректерінің алдын-алу, ескерту, жолын кесу. Сондай-ақ, құқыққа қайшы іс-әрекеттерге жол бермеу, кәмелетке толмағандарға алкогольдік және темекі өнімдерін сату, олардың түнгі уақытта заңды өкілдерінің ілесіп жүруінсіз ойын-сауық мекемелері мен тұрғын үй-жайлардан тыс аумақта болу деректерін анықтау болып табылады.

  Шара барысында жергілікті полиция қызметкерлері мемлекеттік орган, үкіметтік емес ұйым өкілдерімен бірлесіп рейдтік іс-шаралар ұйымдастыруда.

  Қызылорда ОІІД баспасөз қызметінің хабарлауынша, шараның алғашқы екі күнінде 108 құқық бұзушылық анықталған. Ішкі істер органдарына ата-анасыз жүрген 96 жасөспірім жеткізіліп, олардың ата-аналарына әкімшілік хаттамалар толтырылды. Бұған қоса, 8 жасөспірім профилактикалық және тізімдік есепке алынды.

  Сондай-ақ, кәмелетке толмағандардың түнгі уақытта ойын-сауық мекемесінде болуына жол бергені үшін 2 кәсіпкер ҚР ӘҚБтК-нің 132-бабы бойынша әкімшілік жауапкершілікке тартылды.

  Шара 28 наурызға дейін жалғасады.