12 қыркүйек: Атаулы күндер мен оқиғалар
Қазақ киносының күніҚазақ киносының күні 1941 жылы Қазақ КСР Халық комиссарлары кеңесінің №762 қаулысына сәйкес, Алматы киностудиясы құрылды. 1960 жылы атауы «Қазақфильм» киностудиясы деп өзгертілді, ал 1984 жылы оған қазақ кинематографиясының кемеңгер қайраткері Шәкен Аймановтың есімі берілді.
Сондай-ақ, дәл осы күні Иранда да кино күні атап өтіледі.
1997 жылы Қазақстан Республикасының Президенті Нұрсұлтан Назарбаев «Қарқара-93» халықаралық көрмесіне барып, өз өнімдерін Қазақстан нарығына шығаратын кәсіпорындардың, фирма және компаниялардың экспозицияларын көрді.
1998 жылы Алматы қаласында ақын, ғалым, қоғам қайраткері Ахмет Байтұрсыновтың ескерткіш-бюсті мен мұражай үйінің ашылу салтанаты өтті.
2015 жылы Алматыда зияткерлік ойындар бойынша алғаш рет «Еуразия Кубогы» өткізіліп, оған Қазақстан, Ресей, Әзербайжан, Германия, Грузия, Израиль, Латвия, Тәжікстан, Түрікменстан және Өзбекстан командалары қатысты.
2015 жылы Астана әуежайында Елбасы Нұрсұлтан Назарбаев Халықаралық ғарыш стансасынан оралған «Союз ТМА-16М» ғарыш кемесінің халықаралық экипажын құттықтады.
«Біз баршамыз сіздердің аман-есен оралғандарыңызды тіледік. Әрине, барлық Қазақстан халқы біздің үшінші ғарышкеріміз Айдынның (Айымбетов - ред.) сәтті оралуын күтті. Байқоңыр ғарыш айлағының мерейтойлы жылында бұл өте айрықша мәні бар оқиға. 1960 жылы әлемдегі ең ірі ғарыш айлағы болып саналатын «Байқоңырдың» құрылысы басталды. Дәл осы жерден адам жердің тартылыс күшін еңсеріп, алғашқы жер серігі, бірінші адам ғарышқа ұшты. Содан бері біз «Байқоңыр» ғарыш айлағынан ғарышқа ұшқан адамдардың барлығын өзіміздің жерлестеріміздей қабылдаймыз. Ғарышкерлердің аман-есен оралуына сіздермен бірге қуанып, жылы қабылдаймыз», - деді Президент.
