20 қыркүйек: Атаулы күндер мен оқиғалар
Рекрутер күніҚазақстан, Беларусь, Қырғызстан, Ресей мен Украина елдерінде аталып өтіледі. Алғаш рет ол 2001 жылы тойланды. Рекрутерлер ағылшын тілінен аударғанда «recruitment» - кадрлар іріктеп алу, мамандар қабылдау дегенді білдіреді.
1913 жылы Семейде алғашқы қазақстандық футбол командалары: ССК, «Олимп», «Ласточка», «Орлята» және «Ярыш» құрылды. «Ярыш» футбол клубының құрамында қазақтың ұлы жазушысы, қоғам қайраткері, ғұлама ғалым Мұхтар Омарханұлы Әуезов (1897-1961) өнер көрсеткен.
1987 жылы Павлодар облысында Екібастұз ГРЭС-2 құрылысына байланысты Солнечный кенті ашылды. Ол Екібастұз қалалық әкімшілігінің құрамына кіреді. Павлодардан батысқа қарай 172 шақырым және Екібастұздан солтүстікке қарай 42 шақырым қашықтықта орналасқан.
2002 жылы Қазақстан Республикасының Президенті Нұрсұлтан Назарбаев «Адам құқықтары жөнiндегi уәкiл қызметiн белгілеу туралы» Жарлыққа қол қойды.
2010 жылы Таразда Бауыржан Момышұлының 100 жылдық мерейтойына орай жазушы шығармаларының 30 томдық жинағы жарық көрді. Жинақ «Мемлекет қайраткерлерінің жадын мәңгілік ету» бағдарламасы аясында басып шығарылады.
