Қызылордада педагогтерге арналған байқаудың өңірлік кезеңі аяқталды
Kyzylorda-news.kz. «Өрлеу» БАҰО» АҚ филиалы Қызылорда облысы бойынша педагогикалық қызметкерлердің біліктілігін арттыру институтында педагогтер үшін ұйымдастырған бейне-сабақтар мен бейне-дәрістердің «Педагогикалық идеялар панорамасы – 2019» республикалық байқауының өңірлік кезеңі өз мәресіне жетіп, жеңімпаздарды марапаттау салтанаты өтті.
Байқау «Өрлеу» біліктілікті арттыру ұлттық орталығы» АҚ-ның ұйымдастыруымен ҚР Тұңғыш Президенті Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» атты Жолдауын іске асыру аясында жүзеге асырылды.
Салтанатты жиынға Қызылорда облыстық білім басқармасының Қызылорда облыстық оқу орталығы (әдістемелік кабинет) КММ-нің директоры С.Асқаров, Қызылорда облыстық білім басқармасы «Аймақтық дене тәрбиесі методикалық орталығы» директорының орынбасары Е.Алпысбаев және облыс мектептерінің мұғалімдері қатысты.
Институт директоры Б.Елеусінов байқау барысында жасалған жұмыстар туралы айтып өтті.
Өңірлік кезеңге 100-ге жуық педагогтің жұмыстары қабылданып, сараптау жұмыстары жүргізілді. Байқау ережесінде берілген критерийлерге сәйкес келіп, 21 аталым бойынша «үздік» танылған 56 бейнематериал байқаудың республикалық кезеңіне жолданды.
Педагогтерге арналған кеш барысында байқау қатысушылары өз лебіздерін білдіріп, байқау барысында кездескен қиыншылықтары мен қызықты сәттерін айтып, өз ойларымен бөлісті. Сондай-ақ «Өрлеу» БАҰО» АҚ ұжымына педагогикалық тәжірибелерімен бөлісуге мүмкіндік жасағандары үшін алғыстарын білдірді.
«Үздік» деп танылған жеңімпаздар дипломдармен марапатталды.
