АУЫЛДА СПОРТ КЕШЕНІ БОЙ КӨТЕРДІ
Шиелідегі Алғабас елді мекені іргелі ауылдардың бірі. Жұртшылық алдындағы есепте осы елді мекен қарайтын Жуантөбе ауылдық округінде өткен жылы атқарылған істердің жай-жапсары баяндалды.
Ауылдық округ әкімі Ә.Бегайдаров баяндамасын былтырғы кездесуде айтылған ұсыныс-пікірлердің орындалу барысымен бастады. Содан соң жиналғандарды ауыл тынысынан хабардар етті.
Алғабас ауылында 555 отбасы, 3175 халық тұрады.
Жуантөбе ауылдық округінде мәселелерінің барлығы дерлік шешілген. Ауыз судан, аяқ судан, жарықтан еш проблема жоқ. Мектеп, балабақша, мәдениет үйлері күрделі жөндеуден өтіп, халық игілігіне берілген.
Өткен жылы жобалық құны 36 млн. 419 мың теңгеге ауылдық округтің әкімшілік ғимараты салынып, мемлекеттік-жекеменшік әріптестік аясында «БЕТА и К» жауапкершілігі шектеулі серіктестігінің директоры Ерболат Жылқайұлының жеке қаражатына жобалық құны 42 млн. теңгенің жаңа спорт кешені пайдалануға берілді.
