Коронавирус: Қызылордада тағы да жалған ақпарат таратқандар анықталды
Kyzylorda-news.kz. Қызылорда облысының тұрғындары әлі де жалған ақпарат таратуды қояр емес. Халық арасында алаңдатушылық туғызып отырған коронавирус жайлы жалған ақпарат таратқан тағы да екі адам анықталды. Бұл туралы облыстық Полиция департаментінің баспасөз қызметі хабарлады.Бірінші дерек бойынша полицияға «WhatsApp» желісі арқылы «Класстастар» чатына «Короновирус деген біздің Бекбауылдан шығыпты, Аралға алып келіп жатыр» деп аудиожазбаны белгісіз әйел адам таратып жатқаны туралы хабарлама келіп түскен.
Екінші дерек бойынша «WhatsApp» желісі арқылы «Ағайындар» чатына нақты аты-жөнін айтып, ауырмаған аудан тұрғыны коронавирус ауруымен ауырып, ауылда еркін жүр – деген аудиожазбаны белгісіз ер адам таратып жатқаны туралы арыз келіп түскен.
Бұл деректер дереу тексеріліп, жедел іздестіру жұмыстарының нәтижесінде мессенджер арқылы жалған ақпарат таратқан Қызылорда облысы Арал ауданының тұрғыны 33 жастағы әйел мен Жаңақорған ауданының тұрғыны 50 жастағы ер адам анықталды. Ұсталған күдіктілер өз әрекеттерін толық мойындап, өкінетіндіктерін айтты. Аталған деректер бойынша ҚР Қылмыстық кодексінің 274-бабы 4 бөлігімен (төтенше жағдай кезінде көрінеу жалған ақпарат тарату) сотқа дейінгі тергеп-тексеру жұмыстары жүргізіліп жатыр.
Полиция қызметкерлері аймақ тұрғандарын төтенше жағдай кезінде жалған ақпараттарды таратпауды, күнделікті әлеуметтік желілерге мониторинг жүргізіліп, арандатушыларды анықтау жұмыстары үнемі жүргізілетіндігін ескертеді.
