24 сәуір: Атаулы күндер мен оқиғалар
Халықаралық жастар ынтымақтастығы күні.Демократиялық жастар дүниежүзілік федерациясының шешімімен жыл сайын 24 сәуір күні атап өтіледі. Алғаш рет 1957 жылы атап өтілді. Бұл дата 1955 жылы өткен Азия мен Африка елдерінің Бандунг конференциясының қорытынды отырысына орай белгіленді. Бұл күн мемлекеттік органдардың, қоғам мен бұқаралық ақпарат құралдарының назарын жастар проблемасына аударту мақсатын тұтады.
1990 жылы Қазақ КСР Жоғарғы Кеңесінің шешімімен Қазақстанның тұңғыш Президенті болып Нұрсұлтан Әбішұлы Назарбаев сайланды.
1991 жылы Түркияда Қазақстан мәдениеті мен өнері күндері басталды. Осы іс-шара шеңберінде «Алтын тамырлар» атты көрме ашылды. Бұл көрме қазақ пен түрік халықтарының тарихи тамырластығын қамтыды.
1996 жылы Елбасы Н.Назарбаевқа елдегі ең жоғарғы лауазым белгілері - «Алтын Қыран» ордені, төсбелгісі және Президент байрағы тапсырылды.
2000 жылы Алматыда «Еуразия - 2000» экономикалық саммиті өз жұмысын бастады. Саммитте Орталық Азия және Кавказмаңы елдері басшылары интеграция, жаһандану мәселелерін, Еуразияның болашағын талқылады.
2012 жылы Мұхтар Әуезов қорының алғашқы «Кемеңгер» Құрмет белгісіне белгілі қазақстандық ғалым, академик Мұрат Гильманов ие болды.
2013 жылы Қостанай облыстық шығармашылық үйінде суретші Майя Демееваның жеке көрмесі ашылды.
2013 жылы Қытайда Қазақстандық студенттер қауымдастығы құрылды.
2014 жылы Астанада Тәуелсіздік сарайында ХІІ Еуразиялық медиафорум жұмысын бастады.
