МАМАН ТАПШЫЛЫҒЫ КЕДЕРГІ КЕЛТІРУДЕ
Бүгінгі таңда Байқоңырда тұратын 2500 орыс тілді қазақстандық бала мектептерде ресейдің білім стандартымен оқуда. Қызылорда облысының әкімдігі жұлдызды қалашықта орыс кластары бар қазақстандық мектептерді ашу мәселесі 2020 жылға қарай шешілетінін жеткізді, деп хабарлайды BNews.kz тілшісі.
Облыс әкімінің орынбасары Серік Қожаниязов атап өткендей, нақты кезеңде Байқоңырда қазақстандық білім стандартына негізделген 6 мектеп пен 1 балабақша бар. Аталған мектептерде орыс кластары да жұмыс жасайды. Алайда, ол аздық етуде. «Әрине, біз мұндағы орыс тілді балалардың қазақстандық кітаптардан білім алып, болашақта бітіруші түлектермен бірге ҰБТ тапсыруына мүмкіндік жасауға тиіспіз. Бұл мәселені 2020 жылға қарай толықтай шешуге болады», - деп атап өтті С.Қожаниязов.
Оның айтуынша, орыс тілді кластарға мамандар жетіспейді. Мәселен, бастауыш сыныптарға маман табылғанымен, жоғары сынып оқушыларына қазақ тілі, тарих және география пәндерінің мұғалімдері жетіспейді.
