Шағын ауыл Шорнақта шу шықты

Kyzylorda-news.kz. Кешелі бері ел ішінде желдей ескен әңгіменің шын-өтірігін ажырату қиындау болғаны рас. Бірақ ресми ақпарат көздері арқылы ауыл тұрғындары арасында ұрыс-керіс шығып, төбелеске ұласқан. Полицияның дерегі бойынша елді мекендегі қазіргі жағдай тұрақты. Күдіктілер ұсталды. Тергеу жүруде. Дегенмен бұл оқиғаға саяси өң беріп, ұлтаралық араздық тудырғысы келетін арам пиғылдылар да табылып жатқанға ұқсайды. Осы ретте күллі әлем онсызда елең-алаң күй кешіп отқан сәтті, екеуара ұшқынды алаулатып, жалаулатып әкетудің соңы жақсылыққа апармайтыны анық. Сондықтан ата бабамыз мұрат еткен бейбіт күндердің әр сәтін бағалап, береке мен бірлігімізді уысымыздан шығарып алмайық дегім келеді. "Бірлігі бекем ел болайық." Ата-баба жолымен сөзге тоқтаған ел екендігімізді, тектілігімізді танытайық! Тентегін тезге салып, тәрбиеге тал бесіктен көңіл бөлген елдің тыныштығының болмашы нәрсенің салдарынан бұзылғанын қаламаймын. Індет дендеген уақытты естен шығармай, сын сағаттардан аман есен өтейік. Заманымыз бейбіт, өміріміз тыныш болсын.