Қызылордалық Мейрамкүл Жүсіпова республикалық байқауда жеңімпаздар қатарынан көрінді
Kyzylorda-news.kz. Қызылордалық Мейрамкүл Жүсіпова Нұрсұлтан Назарбаев қоры ұйытқы болған республикалық «Қайырымдылық керуені» конкурсының «Туған жер» номинациясы бойынша жеңіске жетті.Ал 22 жерлесіміз Дариға Назарбаеваның алғыс хатымен марапатталды. Олардың қатарында облыстық өзбек этномәдени бірлестігі жетекшісінің орынбасары Манзура Абдугафарова, «Қоғамдық келісім» КММ баспасөз хатшысы Әсел Абзал және аға сарапшысы Руслан Орлов бар.
Бұл байқауға өңірден 37 азамат өтінім беріп, 23-і бақ сынап, осындай жетістіктерге қол жеткізді. Бұл ретте, облыстық іскер әйелдер қауымдастығы ұжымының сіңірген еңбегін айрықша атап өткен жөн. Марапат иелері қайырымдылық шараларына шын ниетпен, бар ынта-ықыласымен араласқан, ізгі ниетті, жомарт жүректі, мейірімді жандар.
