Қызылордада 36 жастағы жүргізуші екі адамды қағып кетті

Kyzylorda-news.kz. Қызылорда қаласы Бұқарбай батыр көшесінің бойында жаяу жүргіншілер өтпелімен өтпекші болған екі азаматшаны белгісіз автокөліктің қаққандығы туралы полицияға хабарлама түсті.

Орын алған жол-көлік оқиғасы бойынша жедел түрде іздестіру шаралары басталып, оқиға орнынан сұрастыру жұмыстары жүргізілді.

Кешенді іздестіру шараларының нәтижесінде 1 сағат ішінде күдікті автокөлік анықталды. Көлік тізгіндеген 36 жастағы қала тұрғынына қатысты оқиға орнында Қазақстан Республикасының Әкімшілік құқық бұзушылық туралы кодексінің 610-бабының 1-бөлігімен (Көлiк құралдары жүргiзушiлерінiң жол жүрісі қағидаларын адамдардың денсаулығына зиян келтiруге, көлiк құралдарының немесе өзге де мүлiктiң бүлінуіне алып келген бұзушылығы) әкімшілік құқық бұзушылық туралы хаттама толтырылды. Жаяу жүргіншілердің өмірі мен денсаулығына қауіп жоқ.

Жедел әрекет еткен Қызылорда облысы полиция департаментінің Жергілікті полиция қызметі басқармасының іздестіру тобының ерекше тапсырмалар жөніндегі аға инспекторы полиция майоры Нартай Азат ізін суытпай күдікті автокөлікті анықтады. Тәжірибесі мол, өз міндетін жауапты әрі қырағылықпен орындайтын полиция майоры Нартай Азат Ішкі істер органдарында 2010 жылдан бері қызмет атқарады.

Жаяу жүргіншілердің бірінің туысы әлеуметтік желілер арқылы Нартай Азат бастаған қызметкерлер тобына алғысын білдіріп, жазба қалдырған.