Жалағашта боранды күні жоғалған малшы мен ұлы табылды
Kyzylorda-news.kz. 16 қараша күні сағат 09:00 шамасында 41 жастағы азамат және оның 11 жасар ұлы екеуі атқа мініп, Жалағаш ауданының Аққыр ауылынан 80 шақырым қашықтықта орналасқан «Түгіскен» учаскесінде орналасқан фазендаға қарай бет алған. Бірақ, осы уақытқа дейін фазенда басына бармағандығы белгілі болды.
Осы дерекке байланысты жоғалған адамдарды іздестіруге Қызылорда облысы Полиция департаментінің Жалағаш аудандық полиция бөлімінің жеке құрамы дереу жұмылдырылды. Полицейлерден, Төтенше жағдай департаментінің қызметкерлері, ауыл тұрғындары мен еріктілерден арнайы топ құрылып, екі күн бойы жоғалған азаматтарды іздестіру жұмыстары жүргізілді. Ауданның барлық ауылдары, далалық жолдар түгел қамтылды.
Бүгін, іздестіру шараларының нәтижесінде жоғалған әкесі мен ұлы дін аман табылды.
Олар Жалағаш ауданы, Аққыр ауылына қарасты «Бекей» далалық жерден солтүстікке қарай 60 шақырым жерден табылды.
«Іздестіру жұмыстары сәтті аяқталды. Әкесі мен ұлы қалыңдап жауған қар мен ақ түтік боранның әсерінен келе жатқан жолдарынан адасып кеткен. Үздіксіз жүргізілген іздестіру жұмыстарының нәтижесінде олар аман-есен табылды. Аймақ тұрғындарынан дауылды ескерту жарияланған уақытта алыс сапарға шықпауларын сұраймыз. Шаруа қожалықтарының жұмысшылары қыстаулар мен жайылымдардан алыс кетпеуге тырысуы қажет»,- дейді департамент бастығы полиция полковнигі Сұлтан Бектөре.
