ӘКІМШІЛІК ІСТЕРДІ СОТҚА ДЕЙІН ШЕШУ ШАРАЛАРЫ ТАЛҚЫЛАНДЫ
Қызылорда облыстық сотының мәжіліс залында Қызылорда қаласының мамандандырылған әкімшілік соты судьяларының ұйымдастыруымен «Әкімшілік құқық бұзушылықтардың алдын алу және әкімшілік істерді сотқа дейін шешу шаралары» тақырыбында дөңгелек үстел өтті.
Аталған шараға Қызылорда облыстық сотының судьясы Ш.Маликова, әкімшілік сот төрағасы М.Ибрашев, судьялары Г.Искакова, К.Еспенбетова, С.Утегенова, Ш.Қожантаев, О.Абдукаликов және кеңсе меңгеруші А.Аблаева, ОІІД-нің әкімшілік полиция, көші-қон қызметі және жергілікті полицияның қызметкерлері қатысты.
Дөңгелек үстел барысында сот төрағасы өз баядамасында 2016 жылдың 12 айы мен 2017 жылдың 12 айындағы әкімшілік құқық бұзушылықтар статистикасына тоқталып өтті.
Сондай-ақ, судья С.Утегенова әкімшілік істердің сотқа түсуін азайту, медиация және дауды сотқа дейінгі шешу мақсатында атқарылатын шаралар бойынша баяндама оқып, әкімшілік құқық бұзушылық туралы хаттамаларды толтыру барысында орын алған кемшіліктерді айтып, хаттамаларда құқық бұзушының іс әрекетін ҚР ӘҚБтК-нің баптарының шеңберінде дұрыс толтырып және құқық бұзушыға қатысты дәлелдемелерді толық жинауды басты назарда ұстауды тапсырды.
Әкімшілік істерді электронды түрде сотқа жолдау бойынша әкімшілік сотының кеңсе меңгерушісі А.Аблаева баяндама жасап, ішкі істер басқармасы инспекторларының бірқатар сұрақтарына жауап берді.
Судьялар әкімшілік полиция мен учаскелік полиция инспекторларына әкімшілік құқық бұзушылық туралы хаттама толтырудың себептері мен негіздеріне, оның талапқа сай рәсімделу ережелеріне және әкімшілік құқық бұзушылық туралы істі сотқа жолдау мерзімдері жөнінде өз пікірлерін ортаға салды.
Қызылорда қаласының мамандандырылған әкімшілік сотының баспасөз қызметі
