ҚАЗАЛЫДА АУЫЛДЫҚ КЛУБ АШЫЛДЫ
Қазалы ауданындағы Жалаңтөс батыр ауылында ауылдық клуб пайдалануға берілді.
Жаңа клубтың ашылу салтанатына қатысқан «Нұр Отан» партиясы Қызылорда облыстық филиалы төрағасының бірінші орынбасары Ибадулла Құттықожаев, аудан әкімі Нажмадин Шамұратов ауыл тұрғындарын көптен күткен қуаныштарымен құттықтады.
Екі қабатты 150 орындық клубта көрермендер залы, үйірме бөлмелері, кітап сақтау бөлмесі, оқырмандар залы қарастырылған. Қазіргі таңда клубта 4 үйірме жұмыс жасайды.
И.Құттықожаев облыс әкімінің құттықтауын жеткізіп, клуб ұжымына түрлі түсті теледидар сыйлады. Мемлекеттік сыйлықтың лауреаты Ажаркүл Алдажарова ауыл тұрғындары атынан алғысын білдірді.
Жаңа клубтың лентасы қиылғаннан кейін қонақтар ғимарат ішімен танысты. Көрермен залында Жалаңтөс батыр туралы деректі фильмді тамашалады.
– Осыған дейін Жалаңтөс батыр туралы деректерді тек кітап беттерінен ғана оқып білсек, бүгін фильм арқылы алған әсеріміз ерекше. Ат үстінде жүріп, туған жерінен жырақта жерленген Жалаңтөс батырдың елімізді қорғаудағы ерлігі туралы жан-жақты мағлұмат алдық - деп фильмнен алған әсерін бөліскен оқушы Динара Қайрулла.
