ТАРИХИ-ТАНЫМДЫҚ САЯХАТ
Қызылорда облыстық музейі мен "Рухани жаңғыру" орталығы мамандары "Қазақстанның киелі жерлерінің географиясы" жобасы бойынша "Тарих толқынында" атты тарихи-танымдық саяхат ұйымдастырды.
Саяхатқа "Рухани жаңғыру" орталығы тарапынан Қызылорда қалалық оқушылар мәслихатының белсенді жастары тартылып, ежелгі Жетіасар мәдениеті ескерткіштерінің бірі – Жалпақасар қалашығына, ортағасырлық Сортөбе қалашығына және Қорқыт ата тарихи-мемориалдық кешеніне облыстық музейдің "Археология және этнография" ғылыми зерттеу бөлімі қызметкерлері тарихи-танымдық экскурсия жүргізді.
Саяхат барысында оқушылар ежелгі және ортағасырлық қалалардың тарихымен, сәулет өнерімен, тұрмыс-тіршілігімен танысты. Оқушылар бір мезет сол уақытқа оралып, сан ғасыр бұрын өмір сүрген халықтың табанының ізі жатқан жерде тұрып, қолдарының табы қалған бұйымдарды ұстап, ерекше әсерде қайтты.
Жастар бір сәт археолог ретінде өз қолдарымен ескі керамикалық ыдыстардың сынықтарын тауып, ғасырлар арасындағы тылсым байланысты сезінді.
Саяхатқа барлығы 25 оқушы мен "Рухани жаңғыру" орталығы және Қызылорда облыстық музейінің қызметкерлері, сондай-ақ, БАҚ өкілдері қатысты.
