Сыр Медиа

Қызылорда қаласында Ә.Тәжібаев атындағы облыстық әмбебап ғылыми кітапханада «Ауыл шаруашылығы кешеніндегі қазіргі заманғы сыбайлас жемқорлыққа қарсы тетіктер» тақырыбында ғылыми-тәжірибелік конференция өтті.

Конференцияға мемлекеттік органдардың басшылары мен заңгер мамандары, ауылшаруашылығы саласының ардагерлері мен қызметкерлері, азаматтық қоғам, БАҚ өкілдері қатысты.

Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті сыбайлас жемқорлық профилактикасы басқармасының басшысы Бағдат Ізкенов конференция жұмысын ашық деп жариялап, агроөнеркәсіп кешеніндегі сыбайлас жемқорлыққа қарсы тетіктерге тоқталып өтті.

Конференция қатысушыларының назарына еліміздің сыбайлас жемқорлыққа қарсы тұру саясатының басым бағыттарын айқындайтын және атқарылып жатырған жұмыстар туралы дайындалған бейнеролик ұсынылды.

Конференцияның алғы сөзінде «Нұр Отан» партиясының облыстық филиалы төрағасының орынбасары Ержан Байтілес еліміздің тұрақты дамуына кері әсер ететін сыбайлас жемқорлық секілді індетпен күресуді әрбір адам өзінен, өзінің отбасынан бастауды, бала тәрбиесіне ерекше назар аудару керек екендігін баса айтып өтіп, конференция жұмысына сәттілік тіледі.

Келесі кезекте сөз алған ауылшаруашылығы саласының құрметті ардагері Балтабай Ысқақов жас мамандарға отанға, туған жерге шынайы қызмет етуге, адал еңбек жасауға шақырды.

Департаменттің бас маманы Нұғыман Жақұдаев өз хабарламасында облыстағы агроөнеркәсіп кешені саласындағы сыбайлас жемқорлық тәуекелдерін анықтау бойынша жүргізілген сыртқы талдау нәтижелерін баяндаса, Агроөнеркәсіптік кешендегі мемлекеттік инспекция комитетінің Қызылорда облыстық аумақтық инспекциясы басшысының міндетін атқарушы Жанат Дүзелбаева агроөнеркәсіп саласындағы сыбайлас жемқорлықтың алдын алу бағытында атқарылып жатқан жұмыстардың барысы туралы хабарлама жасады.

Конференция соңында тиісті ұсынымдар қабылданды.