Сыр Медиа

1995 жылы 30 тамызда Ата Заңымыз – еліміздің Конституциясы қабылданып, «Қазақстан Республикасының мерекелері» заңына сәйкес мемлекеттік мерекелер тізіміне енген болатын. Осылайша Республика Конституциясының күні – барлық Қазақстан халқы мерекелейтін жалпы мемлекеттік мейрамға айналды.

Ата заңымыздың назар аударатын басты ерекшелігі – бұған дейінгі Конституциялар өкілдік органдар арқылы қабылданған болса, 1995 жылғы 30 тамыздағы конституция халықтың тікелей қатысуымен референдум арқылы қабылданып, еліміздің халқы өзінің және келер ұрпақтың болашағын айқын белгілеп алды.

Осы атаулы күнге байланысты облыс орталығындағы «Ақмешіт» музей филиалы «Ата заң – Тәуелсіздік тірегі» атты фотокөрме ұйымдастырды. Көрмені қала тұрғындары мен қонақтары, әсіресе, жастар тамашалады.

«Қазақстан Республикасының Конституциясы – мемлекеттің негізгі заңы әрі жоғары заң күші бар акт болып табылады. Ол – құқықтық жүйенің фундаменті, мемлекеттің негізгі құқықтық құжаты. Қазақстан Республикасының Конституциясы барлық қоғам, құқық салаларының заңдық базасы, ал оның нормалары басқа нормалар үшін жетекші фундаменттік қағида болып саналады. Облыстық тарихи-өлкетану музейінің филиалы – «Ақмешіт» музейі Конституция күніне орай «Ата заң – Тәуелсіздік тірегі» атты фотокөрме ұйымдастырып отыр», - деді филиал меңгерушісі Кенже Ахметова.

Көрменің түпкі мақсаты – келушілерге Ата заң туралы түсінік беру, саяси санамен таным белсенділіктерін арттыру. Бұған қоса, аталған көрмеге музей қорындағы құнды құжаттар, кітаптар, фотосуреттер қойылды.

Көрме 30 тамызға дейін жалғасын табады.