ЗАМАНАУИ ТЕХНОЛОГИЯЛАРМЕН ЖАБДЫҚТАЛҒАН ӘЛЕМДЕГІ ҮШІНШІ ЗАУЫТ
Өңірлік коммуникациялар қызметінде өткен онлайн-конференцияда облыстық индустриялық-инновациялық даму басқармасы басшысының орынбасары Жанар Берденова өндірісте жаңа технологияларды қолданатын және де өнімі экспортқа бағытталған бірқатар жобалардың жүзеге асырылу барысын баяндады.
Айталық, индустрияландыру бағдарламасының екінші бесжылдығы аясында Қызылорда қаласында салынып жатқан шыны зауыты заманауи технологиялармен жабдықталған әлемдегі үшінші зауыт болмақ. Әзірге мұндай зауыт тек Жапония мен Қытайда бар. Сондықтан бұл зауытты аталған өндіріс саласында әлеуеті жоғары Финляндия, АҚШ, Бельгия және Италияның компаниялары жабдықтайды.
Соңғы үш жылда жұмысы қайта жанданған «Шалқия» кенішін игеруде де тиімділігі жоғары жаңа технология пайдаланылады. Кәсіпорында руда тік конвейерлі инновациялық әдіспен өндіріледі. Әлемнің жетекші елдерінің мырыш-қорғасын өндіретін энергоүнемді жаңа технологияларын қолдану арқылы межеленген экономикалық нәтижелерге қол жеткізуге болады. Бұл жерде игерілетін руда терең өңделеді және қажетті металдың үлесі де айтарлықтай артады. Сонымен қатар, өндіріс барысында неміс технологиясын қолданатын үй құрылысы комбинаты іске қосылды. Вейлер неміс компаниясының құрал-жабдығымен жабдықталған, «РМЗ- Шапағат» ЖШС-ның үй құрылысы комбинаты бүгінгі заман сұранысына сай бірегей жоба десек болады.
