ЖАЛАҒАШТЫҢ ҮЗДІК ҰЙЫМЫ
Ауылдың өзекті мәселелеріне, оның ішінде тұрмыс-тіршілігі аз қамтамасыз етілген отбасыларға көмек көрсетіп келе жатқан, ылғи да ауыл жастарына түзу жолды сітеп отыратын жалағаштық «Иманқұл» мешітінің ұжымына ауыл халқының айтар алғысы көп. Қызылорда облысы, Жалағаш ауданындағы мешіт ұжымы «Рухани жаңғыру» бағдарламасы бойынша өткізілген «Жомарт жүрек» байқауында «Жылдың үздік ұйымы» номинациясына ие болған.
Бір ғасырдан астам уақыт бұрын бой көтерген «Иманқұл» мешітінің имамы Айбек Мәдиев көмек сұрай келген жандарға қашанда қол ұшын созуға дайын. Жыл басынан бері әр ай сайын қайырымдылық шараларын ұйымдастырып, аз қамтамасыз етілген отбасыларға азық-түлік, киім-кешекпен көмек көрсеткен. Сонымен қатар "Ұмай' мүмкіндігі шектеулі балалар бақшасына қаржылай және азық-түлік өнімдерімен көмек берген.
Биылғы жылы көктем айларында ауыл ардагерлерімен Қорқыт ата кесенесі мен Марал Ишан баба басына барып тәу етіп қайтқан болатын. Сондай-ақ қасиетті Рамазан айында кең көлемде қайырымдылық шарасын өткізіп, 100-ге жуық отбасын азық-түлікпен қамтамасыз етті. Сонымен бірге балалар күніне орай балаларға арнап сый жасап, "Мектепке жол" акциясы аясында біршама оқушыға оқу-құрал жабдықтарна көмек көрсеткен.
