Сыр Медиа

    Достық үйінің мәжіліс залында корейлердің Қазақстанда тұрғанына 80 жыл толуына орай Алматы қаласындағы Корея Республикасының бас консулы Чжон Сын Мин корей этносының ардагерлері және жастарымен кездесті. Кездесу барысында екі ел арасындағы ынтымақтастық пен татулық туралы айтылды, деп хабарлайды облыстық Қазақстан халқы ассамблеясының баспасөз қызметі.  

    – Корей халқының тарихы Қазақстан тарихымен тығыз байланысып жатыр. Осыдан 80 жыл бұрын олардың жер аударылуы қасіретті кезеңдердің бірі еді. Тағдыр тәлкегімен 1937 жылдың күзінде корейлер қасиетті қазақ жеріне келді. Қазақ халқының қонақжайлығы мен мейірбандығының арқасында олар күштеп қоныс аударудан кейін қиын қыстау заманды өткерді. Осы жылы корейліктердің Қазақстанда тұрып жатқанына 80 жыл толды. Сондай-ақ, Корея-Қазақстан арасында дипломатиялық қарым-қатынастың орнағанына биыл 25 жыл. Осы жылдар аралығында екі ел арасындағы қарым-қатынас нығая түсті, -деді бас консул.

     Сонымен қатар,  Чжон Сын Мин Корей елінің салт-дәстүрі, әдет-ғұрпы жайында айтып өтті. Сөз соңында ол мұндай кездесулер әріптес екі елдің ынтымақтастығын одан әрі нығайтатындығына сенім білдірді.