Қызылордалық полицейлер Шалқар Ақымғалиевті еске алды

Бүгін Қызылорда облысы Полиция департаментінде кәсіби даярлық сабағы өтті. Онда полицейлер атыраулық әріптесі Шалқар Ақымғалиевты еске алды, деп хабарлайды Kyzylorda-news.kz ақпараттық агенттігі.

Шалқар Ақымғалиев 21 наурыз күні Атырау қаласында көпірден секіріп кеткен қызды құтқарамын деп мерт болған.

Сол күні «102» операторына Атырау қаласындағы орталық көпірден белгісіз азаматшаның өзенге секіргендігі жайлы хабарлама түскен. Оқиға орнына алғашқы болып жеткен Атырау қаласының полиция басқармасының патрульдік полицейі полиция сержанты Шалқар Ақымғалиев азаматшаны құтқару үшін ойланбастан мұздай суға түскен. Өзгенің өмірін құтқарамын деп өз өмірін қиған жас полицей азаматшаны құтқару барысында өзі ерлікпен қаза тапты.

«Ерлігі ешқашан ұмытылмайтын ерлерді ұлықтау біздің азаматтық парызымыз. Осы орайда бүгінгі «Ерлік сабағында» қызылордалық тәртіп сақшылары антына адал, еліне, Отанына қызмет жасауда өзінің өмірін қию арқылы ерлік жасаған Шалқар Ақымғалиевты бір минут үнсіздікпен еске алды» делінген департаменттің баспасөз қызметінің хабарламасында.
Департамент қызметкерлері қаза болған Шалқар Ақымғалиевтың отбасына 1 млн 800 мың теңге материалдық көмек беру ұсынысын бірауыздан қолдады.

Жаңалықтар

05 сәуір 2019 ж. 726 0