Сыр Медиа

Kyzylorda-news.kz. Қызылордада балабақша бүлдіршіндері арасында «Бас киімдер шеруі – 2019» байқауы өтті.

Байқау қалалық мәдениет және тілдерді дамыту бөлімінің ұйымдастыруымен Асқар Тоқмағамбетов атындағы қалалық мәдениет үйінде өткізілді. Жыл сайын дәстүрлі түрде ұйымдастырылатын бұл байқауға биыл 9 балабақшадан 9 бүлдіршін қатысты.

Балдырғандар бұл сайыста өздерін таныстырып, өнерлерін ортаға салды. Сондай-ақ байқаудың соңғы кезеңінде түрлі тақырыптағы бас киімдерден сән үлгісін көрсетті. Атап айтар болсақ, бүлдіршіндер «Ұлы даланың жеті қыры», «Цифрлы Қазақстан», «Қызғалдақ» атауындағы бас киімдерді киім, көрермендердің көзайымына айналды.

Байқау қорытындысы бойынша І орынды «Алтын ұя» балабақшасының тәрбиеленушісі Айзере Ботабаева иеленді. Ал ІІ орынды №3 «Қарлығаш» балабақшасынан келген Қоныс Арслан қанжығасына байлады. «Балапан» балабақшасының намысын қорғаған Амина Рүстемова мен «Нұр Орда» балабақшасының бүлдіршіні Амина Болатбек ІІ орынды өзара бөлісті.

Байқауда қалған қатысушылар арнайы номинациялармен марапатталды.