Сыр Медиа

    А.Тоқмағамбетов атындағы қалалық мәдениет үйінде «Славяне» қоғамдық мәдени-орталығы» қоғамдық бірлестігінің ұйымдастырумен бастауыш және мектепке дейінгі балаларға арналған жаңажылдық шырша кеші өтті.

    Аталған бірлестіктің жетекшісі Галина Щербакова бастаған мерекелік  шыршаға бірлестікпен тығыз қарым-қатынас жасайтын №5, 23, 198, 233 орта мектеп оқушылары, өзге де этномәдени орталықтың белсенді балалары, «Анар Бэби» оқу орталығының бүлдіршіндері, жас хоккейшілер қатысты.

    Жаңа жыл мерекесіндегі шырша кешінде балғындар үшін қызықты мерекелік шоу-бағдарлама ұйымдастырылды. Балалар шыршаны айнала ән айтып, би билеп, Аяз ата мен Ақшақарды қарсы алды. Жаңа жылдық қойылымда сүйікті ертегі кейіпкерлері, Қораз, Ит кейіпіндегі басты қонақ бүлдіршіндермен әлем халықтарының түрлі ойындарын бірге ойнап, Халк, Бэтмен, Супермен және тағы басқа заманауи кинолар мен мультихикаялардың батырлары халық билерін биледі. Ал, ертегінің ең жағымсыз кейіпкері Жалмауыз кемпір гироскутермен өнер көрсетті. Фиксики жаңажылдық шыршаның шамдарын жақты.

    Рождество қарсаңында өткен мерекелік кештің соңында Қазақстандағы Ресей елшілігі атынан барлық қатысушы балаларға тәтті сыйлықтар таратылды.