Ернар Айдармен дуэт орындауға мүмкіндік алған қызылордалық жігіт қайырымдылық концертін өткізді
Тереңөзектің тумасы Бақдәулет Әбділдаұлы Тасбөгет кентіндегі С.Майқанова атындағы мәдениет үйінде «Жүректен жүрекке» атты қайырымдылық концертін өткізді, деп хабарлайды Kyzylorda-news.kz ақпараттық агенттігі.
Қайырымдылық концерттің ұйымдастырылуына Тасбөгет кентіндегі №11 мектеп-лицейінің директоры Батырбек Абиев көмек көрсеткен.
«Бақдәулетті алғашқыда мектептің 11 сынып оқушылары айтып келді. Олар Бақдәулетті инстаграм желісі арқылы көріп, сонда танысқан. Оқушылар Бақдәулетпен жақын танысып, қарым-қатынас орнатқысы келетінін айтқан соң, оларды Тереңөзек кентіне апардым. Мінез-құлқы қиын балаларды да апарып, Бақдәулетпен таныстық. Онымен танысу оқушылар үшін зор қуаныш болды, әрі олар Бақдәулеттің өмір үшін күресіп жүргенін көріп, өздерінің кейде артық мінез танытатындықтарына ұялды десек болады», - дейді мектеп директоры Батырбек Абиев.
Кішкентайынан ән салуды жаны сүйетін Бақдәулет 2015 жылы көлік апатына ұшырап, жарақат алған. Төрт жылға жуық уақыт аралығында бірнеше отаны бастан өткерген бозбала Төреңөзек кентінде №36 мектепте оқыған. Ол жол көлік апатына ұшыраған уақытта 9 сынып оқушысы еді.
«Балам кішкене күнінен ән салады. «Жүректен жүрекке» атты қайырымдылық концертіне дейін Төреңөзек кентінде де ән кешін өткіздік. Бұл қайырымдылық концертін мектеп оқушыларының бастамасымен ұйымдастырылғанын ескерер болсақ, оның тым жоғары деңгейде өтеді деп ойламадым. Барлығы біз ойлағаннан да асып түсті десек болады. Осы орайда мектеп басшылығы мен оқушыларға айтар алғысым шексіз», - дейді Бақдәулеттің анасы Ұлғаным Сүгірбаева.
Айта кетейік, бұл қайырымдылық концертіне кіру тегін болған. Бірақ жомарт жандар мәдениет үйіне қойылған қайырымдылық жәшігіне қаржы салып, жиналған қаражатты Бақдәулеттің өзіне табыстаған.
Ән кешінің басы-қасында жүрген мектептің психолог маманы Гаухар Дайрабаева мектеп оқушыларының Бақдәулетпен таныстығы, олардың концертке ұйымшылдықпен дайындалуы көптің көңіліне қуаныш сыйлағанын айтады.
«Алғашқыда Бақдәулет Әбділдаұлымен телефон арқылы байланыс орнатып жүрген мектептің жоғары сынып оқушылары оның бұған дейін өз ауылында концерт өткізгенін естіген. Осыдан кейін олар мектеп директорына өтінішпен кіріп, Бақдәулеттің Тасбөгетте де қайырымдылық концерт өткізуіне көмек сұрайды. Сонымен мектеп директоры жоғары сынып оқушылары мен тәуекел топтағы балалар, қиын тәрбиеленетін оқушыларды ертіп Тереңөзек кентіне барып, Бақдәулетпен жақын танысады. Өмірге, әнге құштар Бақдәулетті көрген оқушылардың бұл таныстықтан алған әсері мол болды. Мұнан кейін олар «Біз он екі мүшеміз сау бола тұра, жасап жүрген ісіміз ұят екен. Бұл концерттен кейін біздің өмірге деген көзқарасымыз өзгерді» деп айтқан болатын», - дейді мектеп психологы.
Аталған концертке «Жылы жүрек жастар» еріктілер тобының жетекшісі, мүмкіндігі шектеулі жандар арасындағы би байқауларының жеңімпазы Сағатбек Сиюов қатысып, мектеп ұжымы мен оқушыларына жылы лебізін білдірді.
«Жүректен жүрекке» концерті арқылы көпшіліктің жүрегіне жол таба білген Бақдәулет Әбділдаұлы әнге деген құштарлығының арқасында өмірмен күресіп келеді. Бала күнінен әнші болуды армандаған ол Алматы қаласындағы Республика сарайында танымал әнші Ернар Айдармен дуэт орындайтын болады. Бақдәулеттің анасының айтуынша, қазіргі таңда олар жолға дайындық үстінде. Бақдәулет Әбділдаұлы Ернар Айдармен бірге «Тым болмаса» әнін шырқайтын болады.
Еске сала кетейік, бұған дейін Бақдәулет ағымдағы жылдың 9 наурызында қазақ эстардасының жұлдызы Ернар Айдардың «Тамаша» атты мерекелік концертінде ән кешінің иесімен дуэт айтатынын жариялаған болатынбыз.
