Сыр Медиа

    Бүгінгі қоғам мүддесіне лайықты, жан-жақты жетілген, парасатты, мәдениетті, дені сау азамат өсіру әрбір отбасының, оның ішінде әйелдер қауымының басты міндеті болып табылады.

    Орталық стадионда Жалағаш аудандық әйелдер кеңесі қоғамдық бірлестігінің ұйымдастыруымен І ашық спартакиадасы өтті. Спартакиадаға кент және ауыл округтерінен, бөлім, мекемелерден ақ жаулықты аналардан, нәзік жандылардан құралған барлығы 15 команда қатысып, сайыстың 5 түрі бойынша өзара бақ сынасты. Атап айтқанда, бес асық, қол күрес, 60 метрге жүгіру, 1000 метрге жүгіру және эстафета(4х80).

    Спартакиадада аудан әкімінің орынбасары Ж.Тажмаханов сөз алып, Жалағаш аудандық әйелдер кеңесі қоғамдық бірлестігінің І ашық спартакиадасын ашық деп жариялады. Жарыста «Жалағаш аудандық әйелдер кеңесі» қоғамдық бірлестігінің төрайымы Ә.Мәдиева, аудандық ардагерлер кеңесінің төрағасы С.Әлиев, спартакиаданың бас төрешісі М.Жаңабергенов сөз сөйлеп, дүбірлі додаға қатысушыларға сәттілік тіледі. Спорттың 5 түрінен өткен сайысқа 100-ден аса спортшылар қатысты. Жарыс нәтижесінде жалпы командалық есепте Аламесек ауылдық округі 1 орынды жеңіп алды, ал екінші орыннан Бұқарбай батыр ауылдық округінің спортшылары көрінді. Үздік үштікті Жаңаталап ауылдық округі қорытындылады. Жарыс жеңімпаздары мен белсене қатысқан спортшылар «Жалағаш аудандық әйелдер кеңесі» қоғамдық бірлестігінің ауыспалы кубогімен, арнайы Диплом, Алғыс хат және қаржылай сыйлықтармен марапатталды.