Арал ауданы – спорт басқармасының кубогын иеленді
Қызылорда қаласында «Мұз айдыны» спорт кешенінде волейболдан спорт саласы қызметкерлерінің арасында Қызылорда облысы дене шынықтыру және спорт басқармасының кубогы сарапқа салынды, деп хабарлайды Kyzylorda-news.kz.
Жарыстың мақсаты – Елбасы Жолдауынан туындайтын бұқаралық спортты дамыту, салауатты өмір салтын қалыптастыруға шақыру, қызметкерлер арасында достық қарым-қатынасты нығайту.
Жарысқа қала және барлық аудан құрамаларынан 12 команда 125 қызметкер қатысып, жеңімпаз, жүлдегер командалар анықталды.
Нәтижесінде үшінші орынды облыстық спорт басқармасы иеленсе, екінші орын Сырдария ауданының командасына бұйырды. Ал Арал ауданының құрама командасы ақтық сайыста 2:1 есебімен жеңіске жетіп, кубок иегері атанды.
Облыстық дене шынықтыру және спорт басқармасы басшысының ұсынысы бойынша басталған дүбірлі дода алдағы уақытта дәстүрлі түрде өткізілетін болады.
