ТҰРҒЫНДАР ТІЛЕГІ НАЗАРҒА АЛЫНДЫ
Қармақшы ауданының әкімі С.Мақашов Төребай би ауылында есепті кездесу өткізіп, былтыр атқарылған жұмыстар мен алдағы жоспар-жобалар жайын баяндады.
Өткен жылғы есепті кездесуде ауыл тұрғындарынан «Балажарма» каналын «Қос төбе» каналына қосу арқылы ауылға аяқ су келтіру, егіс көлемін ұлғайтып, мал жайылымдық жерлер дайындау, ауылға балабақша салу, сонымен бірге «Батыс Еуропа - Батыс Қытай» автодәлізінен ауылға дейінгі жолды күрделі жөндеуден өткізу және ауыл орталығына мобильді байланыс орнату сияқты мәселелер көтерілген болатын.
Аталған ұсыныстар бойынша «Балажарма» каналы арқылы 1,5 текше метр аяқ су беріліп, «Үсентай» каналының жанындағы мемлекеттік қордағы жерді жалға алу арқылы «Шабан ата», «Орныққан», «Шахзада», «Төкен ата» шаруа қожалықтары және осы шаруашылықтар арқылы ауыл тұрғындары көкөніс, бақша дақылдарын екті. Сондай ақ, 50 орындық №15 «Ақкөгершін» балабақша құрылысы басталды. Мобильді байланыс үшін ауыл орталығына антенна орнатылып, сол арқылы Kcell-Activ байланысы іске қосылды.
Ауыл тұрғындарының тағы бір тілегі аудан орталығына қатынайтын жолды жөндеу болатын. Осы мақсатта биыл облыстық бюджеттен 488,8 млн.теңге қаржы бөлініп, жол жөнделеді.
Сонымен қатар, өткен жылы БҰҰ-ның Даму жоспарының негізінде округ орталығындағы Жеңіс көшесінен ойын алаңы, №199 орта мектеп жанынан жылыжай салынса, медициналық фельдшерлік пункт ел игілігіне пайдалануға берілді. Елді мекенді көркейту, көгалдандыру және абаттандыруға қаралған қаржы арқылы ауылға аяқ су келетін «Келте арық» каналы, ауыл ішіндегі аяқ су жолдары тазартылды, Сырдария өзенінің сағасына насос орнатылып, аяқ су мәселесі толық шешілді.
Ауылдық округте салық органына тіркелген 47 жеке кәсіпкер жұмыс істейді. 2017 жылы мүйізді ірі қара малын өсіру, бордақылау мақсатында «Жосалы Даму» ауылшаруашылығы өндірістік копперативі құрылып, оған 23 адам мүше болып тіркелді. Кооператив ауылшаруашылығын қаржылай қолдау қорынан «Береке» бағдарламасы арқылы 443 бас мүйізді ірі қара малын сатып алды.
