Сыр Медиа

    Сыбайлас жемқорлыққа қарсы мәдениетті қалыптастырудың 2017 жылға арналған кешенді жоспарына сәйкес Қорқыт ата атындағы Қызылорда мемлекеттік университетінің, «Болашақ» университетінің және Ақмешіт институтының басшылығы, оқытушылық құрамы және студенттерінің қатысуымен «Академиялық адалдық және таза сессия – жоғары білім жүйесіндегі сыбайлас жемқорлыққа төзбеушілік ахуалын қалыптастырудың негізгі факторы» тақырыбында облыстық конференция өткізілді.

     Студенттер сарайында өткен конференцияға Мемлекеттік қызметі істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының орынбасары Б.Байхожаев қатысып, оқу процесіндегі академиялық тазалық және таза сессия маңыздылығына тоқталды.

    Іс-шарада «Болашақ» университетінің ректоры Ө.Үмбетов, Қорқыт ата атындағы Қызылорда мемлекеттік университетінің департамент директоры Ж.Майгелдиева,  Ақмешіт институтының бөлім меңгерушісі А.Бекенова баяндама жасады.

    Сонымен қатар, «Демеу» студенттер кәсіподағы комитетінің төрағасы Ш.Қаратайұлы Сыр елінің студент жастары атынан қабылданған сыбайлас жемқорлыққа қарсы үндеуді оқыды.

    Конференция жұмысын Қорқыт ата атындағы Қызылорда мемлекеттік университетінің проректоры А.Жүнісов қорытындылады.