Көпбалалы отбасыларға баспана беру бағдарламасы қашан басталады?
Kyzylorda-news.kz. Көпбалалы отбасыларға 2 пайыздық ипотекалық несие беру ісі мамыр айының соңында басталады, деп хабарлайды «Хабар 24».Бұл туралы Елбасының «Бес әлеуметтік бастамасының» іске асырылуын бақылау жөніндегі қоғамдық кеңес отырысында, Қазақстанның Тұрғын үй құрылыс жинақ банкінің басқарма төрағасы Ләззат Ибрагимова мәлімдеді.
Басқарма төрағасының айтуынша, оған төрт және одан көпбалалы отбасылар, мүмкіндігі шектеулі баланы тәрбиелеп отырған және құрамы толық емес жанұялар қатыса алады. Себебі бұл отбасылардың табысы жоғары емес. Мысалы 12 миллион теңге қарыз көлемінде алса, алғашқы 8 жылда 60 мың, қалған 11 жылда 44 мың теңге шамасында төлем жасай алады. Бағдарлама аясында аталған отбасылардың берілетін пәтерді таңдауға мүмкіндігі бар. Яғни олар көп қабатты немесе жеке тұрғын үй түріндегі баспананы таңдай алады.
«Көп балалы және аз қамтылған отбасылар бұл бағдарламаны асыға күтіп отыр. Себебі осы бағдарламада несие бойынша мөлшерлеме айтарлықтай төмен, яғни жылдық екі пайыз. Осы бағдарлама бойынша бастапқы жарна 10 пайызға дейін төмендетілді. 12 миллион теңге тұратын пәтерді сатып алу үшін салымда 1 млн 200 мың теңге жеткілікті. Бұдан бөлек, бірқатар облыстың, елорда мен Алматы және Шымкент қалаларының әкімдіктері тұрғын үй сертификаттарын бөлу ниетін білдіріп отыр. Тұрғын үй сертификаты 1 млн теңге көлемінде болмақ. Ол кезекте тұрған отбасыға беріледі», - дейді «Қазақстанның тұрғын үй құрылыс жинақ банкі» АҚ басқарма төрағасы Ләззат Ибрагимова.
