Облыс прокуроры түзеу мекемелерін аралап көрді
Kyzylorda-news.kz. Қызылорда облысының прокуроры Нұрлан Бижанов ЗК 169/1 (тергеу изоляторы), ЗК-169/5( қауіпсіздігі аралас) мекемелерін аралап, жұмысымен танысты. Бұл туралы ҚАЖ департаментінің баспасөз қызметі хабарлады.
Қазіргі таңда түзеу мекемесінің аумағында тоғыз кәсіпкер тротуар плиталарын, газ блоктарын және төсемтастар шығару бойынша өндіріс ұйымдастырған. Сонымен қатар «Еңбек-Қызылорда» РМК кірпіш шығару, түрлі металл және темір бетондарын жасау, сондай-ақ тігін өнімдерін (орамал, жастық қабы, сотталғандардың арнайы киімдері, т.б.) шығару орындары да бар.
Мекемеде еңбекке қабілетті сотталғандардың 82 пайызы жұмыспен қамтылған. Оның ішінде 138 жазасын өтеуші «Еңбек-Қызылорда» РМК-да, 101 сотталушы мекеменің шаруашылық жұмыстарына, 210 айыпталушы жеке кәсіпкерлерге жұмыс істейді.
Аталған өндіріс орындарымен танысқан облыс прокуроры жеке қабылдау өткізіп, ҚАЖ департаментінің басшысына бірқатар тапсырмалар берді.
