Қызылорданың үздік спортшылары марапатталды
Қызылордада «Мұз айдыны» спорт кешенінде облыстық дене шынықтыру және спорт басқармасының жылды қорытындылаған алқа мәжілісі өтті, деп хабарлайды Kyzylorda-news.kz басқарманың баспасөз қызметіне сілтеме жасап.
Мәжіліс аясында басқарма басшысы Олжас Акимов 21 спортшыға спорттық атақтар беру туралы куәліктерді табыстады.
Грек-рим күресінен «ҚР еңбек сіңірген жаттықтырушы» атағымен Ғабиден Райымбек, тоғызқұмалақтан Біржан Елеусінов, «ҚР халықаралық дәрежедегі спорт шебері» - панкратионнан Саламат Қалжанов марапатталды.
Қалған спортшыларға спорт түрлерінен ҚР спорт шебері атағының куәліктері берілді. ҚР Президентінің «Ерен еңбегі үшін» медалі еркін күрестен ҚР еңбек сіңірген жаттықтырушысы Әбутәліп Амановқа табысталса, өңірдің 11 спорт маманы Қызылорда қаласының 200 жылдық мерекелік медалімен марапатталды. Сондай-ақ, Сыр спортын насихаттап жүрген журналисттер спорт басқармасының Алғыс хаттарына ие болды.
Жыл қорытындысы бойынша үздік спортшылар, үздік жаттықтырушылар, спорттық-бұқаралық жұмыстарды жолға қоюда жақсы жұмысымен танылған қалалық, аудандық дене шынықтыру және спорт бөлімдері мен спорт мектептері облыстық дене шынықтыру және спорт басқармасының дипломдарымен марапатталды.
Парадзюдодан республика бойынша түңғыш Әлем чемпионы Олжас Оразалыұлы, байдарка және каноэде есуден III жасөспірімдер Олимпиада ойындарының чемпионы Диас Бахраддин, байдарка және каноэде есуден жазғы Азия ойындарының қола жүлдегері Мерей Медетов «Жылдың үздік спортшылары» атанды.
«Жылдың үздік жаттықтырушысы» атағына байдарка және каноэде есуден облыстың аға жаттықтырушысы Мұхитдин Миербеков, әмбебап жекпе-жектен облыстың аға жаттықтырушысы Нұрбек Жармаханов, облыстық Паралимпиялық комитетінің парадзюдо бөлімшесінің жаттықтырушысы Руслан Беркімбай лайық деп танылды.
Сондай-ақ, қалалық, аудандық спорт бөлімдері арасында Қызылорда қаласы бірінші орынды жеңіп алса, Жаңақорған екінші, Шиелі үшінші орындарды иеленді. Айта кетейік, Қызылорда қаласы осымен алтыншы мәрте жеңімпаз атанды.
Спорт мектептері арасында 1-орынды №1, 2-орынды №2 және 3-орынды №5 облыстық олимпиадалық резервтің мамандандырылған балалар-жасөспірімдер мектептері еншіледі. Айта кетейік, №1 спорт мектебі осымен сегізінші мәрте жеңімпаз атанды.
