Қызылордалық жеңіл атлеттер халықаралық турнирден 6 медаль иеленді
Біріккен Араб әмірлігінің Шардж қаласында мүмкіндігі шектеулі спортшылар арасында жеңіл атлетикадан лицензиялық халықаралық турнир аяқталды, деп хабарлайды Kyzylorda-news.kz ақпараттық агенттігі.
Дүбірлі бәсекеде қызылордалық спортшылар 6 медаль олжалап, қараша айында Дубайда өтетін Әлем чемпионатына жолдама алды.
Жарыс нәтижесінде Қолғанат Бақберген ұзындыққа секіруден, Ислам Салимов 100 және 200 метр қашықтыққа жүгіруден күміс жүлдеге ие болды.
Найза лақтырудан Еламан Жоламан қола жүлдені еншілесе, 800 метр қашықтыққа жүгіруден Бағдат Елібаев күміс жүлдегер атанып, рекорд жаңартты. Ол 400 метр қашықтыққа жүгіруден 3-орынды иеленді.
Енді спортшылар 22-27 ақпан аралығында Дубайда жеңіл атлетикадан өтетін лицензиялық турнирге қатысады.
