120 дана пиротехникалық бұйым тәркіленді
Қызылордада «Пиротехника» жедел-профилактикалық іс-шаралары жүргізілуде, деп хабарлайды Kyzylorda-news.kz.
Жаңа жыл мерекеі қарсаңында қала тұрғындарын қауіпсіздік шаралары туралы құлақтандыру мақсатында Қызылорда қаласы Төтенше жағдайлар басқармасының қызметкерлері, қалалық кәсіпкерлік бөлімі және полиция қызметкерлерімен бірлесіп, «Пиротехника» жедел-профилактикалық іс-шараларын жүргізуде.
•Іс-шараның басты мақсаты қала аумағында орналасқан сауда орталықтарында сертификатталмаған пиротехникалық бұйымдардың бей-берекет саудасы, сондай-ақ рұқсат құжаттарынсыз сату фактілерін анықтау және жол бермеу болып табылады.
Аталмыш іс-шараға «Абылай хан атындағы жоғарғы колледжі», «Қызылорда көпсалалы Ұлағат колледжі» және Қызылорда гуманитарлық экономикалық колледждерінің кәсіптік тәжірибеден өтуші студенттері қатыстырылуда. Колледж студенттері қала аумағында орналасқан оқу ордаларының басшыларына пиротехникалық бұйымдарды мектептерде қолдануға болмайтындығын түсіндіріп, үн-парақтарды тарату жұмыстарын атқарды. Сонымен қатар дауысзорайтқыш арқылы халықты құлақтандыру жұмысы жүргізілді.
Профилактикалық іс-шара барысында 120 дана пиротехникалық бұйымдар тәркіленіп, учаскелік полиция қызметкерлеріне тапсырылды.
